కార్తీక పురాణం 9వ రోజు
Karthika Puranam Day 9
యమదండన, హరినామ మహిమపై విష్ణు, యమదూతల సంవాదం; పసిడి విమానంపై అజామీళుడు వైకుంఠం చేరి విష్ణుసాయుజ్యం పొందిన కథ.
విష్ణుదూతలు యమదూతలతో నిట్లనిరి. ఓయమకింకరులారా! మీయేలిక మీకేమని యానతిచ్చెను? యమదండన కెవ్వఁ డర్హుఁడు? పుణ్యములను జెఱచు పాతకంబులెయ్యవి? ముందుగామామాటలకు నన్నింటికి మీరుప్రత్యుత్తర మొసఁగవలయును. అనివిష్ణుదూత లడుగఁగా, యమభటు లిట్లనిరి- పుణ్యాత్ములరగు విష్ణుదూతలారా! మాపలుకులు సావధానులరై వినుండు. మాప్రభుఁ డిట్లని యానతిచ్చెను. సూర్యుఁడు అగ్ని ఆకాశము వాయువు గోవు చంద్రుఁడు సంధ్యలు పగలు దిక్కు కాలము ఇవి మానవునికి సాక్షులు. ఇవి మానవుని సర్వకృత్యముల నెఱుఁగుచుండును. ఇవి యెల్ల నతనియధర్మకృత్యములను నెఱుఁగుచుండును. కావున ఈ మానవుఁడు దండన కర్హుఁడు. ఎవఁడు వేదమార్గమునుండి భ్రష్టుఁడో, శ్రుతిస్మృతులదూషించువాఁడో, సద్వృత్తిగలవారి నిందసేయువాఁడో వాఁడు నాచే దండింపఁదగినవాఁడు. దీనికి సందియమువలదు. వేదవేదాంగముల నెఱిఁగిషట్కర్మములను నాచరించుబ్రాహ్మణుని, స్వస్థుఁడుకాకయున్నగురువునుకాలుమొదలగు వానితోఁ దన్నినవారిని, తల్లిదండ్రులను ద్వేషించువారిని నేను కఠినముగా శాసింతును.
నేటి తెలుగులో విష్ణుదూతలు యమదూతలతో ఇలా అన్నారు. “ఓ యమకింకరులారా! మీ ప్రభువు మీకు ఏమని ఆజ్ఞాపించాడు? యమదండనకు ఎవడు అర్హుడు? పుణ్యాలను చెడగొట్టే పాపాలు ఏవి? ముందుగా మా మాటలన్నిటికీ మీరు బదులు చెప్పాలి” అని విష్ణుదూతలు అడగగా, యమభటులు ఇలా అన్నారు. “పుణ్యాత్ములైన విష్ణుదూతలారా! మా మాటలు శ్రద్ధగా వినండి. మా ప్రభువు ఇలా ఆజ్ఞాపించాడు. ‘సూర్యుడు, అగ్ని, ఆకాశం, వాయువు, గోవు, చంద్రుడు, సంధ్యలు, పగలు, దిక్కు, కాలం ఇవి మనిషికి సాక్షులు. ఇవి మనిషి చేసే పనులన్నిటినీ తెలుసుకుంటూ ఉంటాయి. ఇవన్నీ అతని అధర్మ పనులను కూడా తెలుసుకుంటూ ఉంటాయి. కాబట్టి ఈ మనిషి దండనకు అర్హుడు. ఎవడు వేదమార్గం నుంచి తప్పిపోతాడో, శ్రుతిస్మృతులను (వేదాలను, ధర్మశాస్త్రాలను) దూషిస్తాడో, మంచి నడవడిక గలవారిని నిందిస్తాడో వాడు నా చేత శిక్షించదగినవాడు. దీనికి సందేహం వద్దు. వేదవేదాంగాలను తెలిసి షట్కర్మలను (ఆరు విధి కర్మలను) ఆచరించే బ్రాహ్మణుడిని, అనారోగ్యంతో ఉన్న గురువును కాలు మొదలైనవాటితో తన్నినవారిని, తల్లిదండ్రులను ద్వేషించేవారిని నేను కఠినంగా శిక్షిస్తాను.
ఎల్లప్పుడు కల్లలాడువానిని, ప్రాణిహింస చేయువానిని, కులాచారముల మానినవానిని దీవ్రముగాదండింతును. అనియముఁడ నెను. కాన వారు యమపురికేగఁదగినవారు.
నేటి తెలుగులో ఎల్లప్పుడూ అబద్ధాలు ఆడేవాడిని, ప్రాణిహింస చేసేవాడిని, కులాచారాలను మానేసినవాడిని తీవ్రంగా శిక్షిస్తాను’ అని యముడు అన్నాడు. కాబట్టి వారు యమపురికి వెళ్ళదగినవారు.
ఇచ్చితీసికొన్నవాఁడు, లేనిపనులు చేయునట్లునటించువాఁడు దయ యోర్పులేనివాఁడు, పాపకర్మలందాసక్తుఁడు వీరు యమమందిరమున కేగవలసినవారు. పరదారాభిగమనము చేయువాఁడు యమపురియందుబాధల ననుభవించును. ఎవ్వఁడు ధనలోభముచేఁ దప్పు సాక్ష్యము చెప్పునో, నాకంటె దాతయొక్కఁడు లేఁడని యెవఁడు తనలోఁ దలఁచునో వాఁడు యమబాధను బొందును. మిత్రద్రోహి, నెనరులేనివాఁడు యమదండన కర్హులు. ఎవఁడు కానున్న పెండ్లికి విఘ్నము చేయునో, ఎవఁడు పరులకల్మి కులుకునో, ఎవఁ డొరులబిడ్డలఁ జూచి యసూయపడునో అతఁడు యమసదనమున కేగును. కన్యావిక్రయముచే నెవఁడు జీవనము చేయునో, వడ్డీవ్యాపారముచే నెవఁడు జీవనము చేయునో, వాఁడు యమపురికేగును. తటాకములు, బావులు, కాలువలు వీని కెవ్వఁడు విఘ్నమాచరించునో, ఎవఁడు సత్కార్యములకు విఘ్నమాచరించునో, అతఁడును యమలోకంబునకు నేగును.
నేటి తెలుగులో ఒకరికి ఇచ్చి మళ్ళీ తీసుకున్నవాడు, చేయని పనులు చేస్తున్నట్లు నటించేవాడు, దయ, ఓర్పు లేనివాడు, పాపపు పనులలో ఆసక్తి ఉన్నవాడు వీరు యమమందిరానికి వెళ్ళవలసినవారు. పరదారాభిగమనం (పరాయి భార్యల వద్దకు వెళ్ళడం) చేసేవాడు యమపురిలో బాధలు అనుభవిస్తాడు. ఎవడు ధనలోభంతో తప్పుడు సాక్ష్యం చెప్తాడో, ‘నాకంటే దాత ఒక్కడూ లేడు’ అని ఎవడు తనలో అనుకుంటాడో వాడు యమబాధను పొందుతాడు. మిత్రద్రోహి, అభిమానం లేనివాడు యమదండనకు అర్హులు. ఎవడు జరగబోయే పెళ్ళికి ఆటంకం కలిగిస్తాడో, ఎవడు ఇతరుల సంపదను చూసి ఓర్వలేడో, ఎవడు ఇతరుల పిల్లలను చూసి అసూయపడతాడో అతడు యమసదనానికి వెళ్తాడు. కన్యావిక్రయం (కన్యలను అమ్మడం) ద్వారా ఎవడు జీవనం సాగిస్తాడో, వడ్డీవ్యాపారం ద్వారా ఎవడు జీవనం సాగిస్తాడో వాడు యమపురికి వెళ్తాడు. చెరువులు, బావులు, కాలువలు వీటికి ఎవడు ఆటంకం కలిగిస్తాడో, ఎవడు మంచి పనులకు ఆటంకం కలిగిస్తాడో అతడు కూడా యమలోకానికి వెళ్తాడు.
ఎవఁడు లోభముచే పితృశ్రాద్ధమును వదలునో, ఎవఁడు నిత్యకర్మములను సైతము పరిత్యజించునో, వాఁడును యమసదనమున కేగును.
నేటి తెలుగులో ఎవడు లోభంతో పితృశ్రాద్ధాన్ని (పితృదేవతల తద్దినాన్ని) వదిలేస్తాడో, ఎవడు నిత్యకర్మలను కూడా విడిచిపెడతాడో వాడు కూడా యమసదనానికి వెళ్తాడు.
పరులపాకమును వదలనివాఁడును పరులకై కూలి కన్నము వండువాఁడును, పితృశేషాన్నమును భుజించువాఁడును యమబాధ నొందును. ఒరుల కియ్యవలదని చెప్పువాఁడును, బ్రాహ్మణులకు దానము చేయనివాఁడును, శరణాగతులను జంపువాఁడును, యమబాధ నొందును.
నేటి తెలుగులో ఇతరుల వంటను వదలనివాడూ, ఇతరుల కోసం కూలికి అన్నం వండేవాడూ, పితృశేషాన్నాన్ని (శ్రాద్ధంలో మిగిలిన అన్నాన్ని) తినేవాడూ యమబాధను పొందుతాడు. ఇతరులకు ఇవ్వవద్దని చెప్పేవాడూ, బ్రాహ్మణులకు దానం చేయనివాడూ, శరణు వేడినవారిని చంపేవాడూ యమబాధను పొందుతాడు.
స్నానము సంధ్యావందనము వదలినవాఁడును, ఎల్లప్పుడు బ్రాహ్మణనింద సేయువాఁడును, బ్రహ్మహత్యచేసినవాఁడును, గుఱ్ఱములు, గోవులు వీనిని జంపువాఁడును యమమందిరమున కేగును. ఇట్టియమప్రోక్తము లగు పాపముల నెవ్వ రాచరింతురో, వారు యమునిలోకంబున కేగుదురు. ఈయజామీళుఁడు విప్రవంశోద్భవుఁడు దాసిమగఁడు ఇతఁ డొనర్చిన పాపములకు మేరయే లేదు. పుట్టినది మొదలు చచ్చునంత దనుక నితఁడు పాపమే యుపార్జించెను. ఇట్టిపాపుఁడు విష్ణులోకమున కెట్లు పోఁజాలినవాఁడు.
నేటి తెలుగులో స్నానం, సంధ్యావందనం వదిలేసినవాడూ, ఎల్లప్పుడూ బ్రాహ్మణులను నిందించేవాడూ, బ్రహ్మహత్య (బ్రాహ్మణుడిని చంపడం) చేసినవాడూ, గుర్రాలు, గోవులు వీటిని చంపేవాడూ యమమందిరానికి వెళ్తాడు. ఇలా యముడు చెప్పిన పాపాలను ఎవరు ఆచరిస్తారో, వారు యముడి లోకానికి వెళ్తారు. ఈ అజామీళుడు బ్రాహ్మణ వంశంలో పుట్టినవాడు, దాసి భర్త. ఇతడు చేసిన పాపాలకు హద్దే లేదు. పుట్టినప్పటి నుంచి చనిపోయేవరకు ఇతడు పాపమే సంపాదించాడు. ఇటువంటి పాపాత్ముడు విష్ణులోకానికి ఎలా వెళ్ళగలడు?”
అని యమదూతలు పలికిన పలుకులు విని, విష్ణువు దూతలు చిఱునగవు మోముదమ్మిని దోఁప మేఘగర్జన మాడ్కి గంభీరమైన పలుకులతో నిట్లనిరి.
నేటి తెలుగులో అని యమదూతలు పలికిన మాటలు విని, విష్ణువు దూతలు తమ ముఖపద్మాలలో చిరునవ్వు కనిపిస్తుండగా మేఘగర్జన లాంటి గంభీరమైన మాటలతో ఇలా అన్నారు.
ఓమూఢచేతస్కులారా! యేమి మీ కీవిషయము తెలియలేదా? మీరు ప్రపంచజ్ఞానమే లేనివారుగాఁ దోఁచెడి. సావధానమనస్కులరై వినుఁడు.
నేటి తెలుగులో “ఓ మూఢమనస్కులారా! ఏమిటి, మీకు ఈ విషయం తెలియలేదా? మీరు ప్రపంచజ్ఞానమే లేనివారిగా కనిపిస్తున్నారు. శ్రద్ధగల మనసుతో వినండి.
దుష్టసంగమును బాసి, సత్పురుషుల నాశ్రయించినవాఁడు యమదండనలకు లోఁబడఁడు. స్నానసంధ్యాజపములం దాసక్తి గలవాఁడై అగ్నిహోత్రము వేల్చుచు సకలభూతదయాపరుఁడై యుండువాఁడు యమాలయమునకుఁబోఁడు.
నేటి తెలుగులో చెడ్డవారి సాంగత్యాన్ని విడిచిపెట్టి, సత్పురుషులను ఆశ్రయించినవాడు యమదండనలకు లోబడడు. స్నానం, సంధ్య, జపాలలో ఆసక్తి గలవాడై, అగ్నిహోత్రం వేలుస్తూ (అగ్నిలో హోమం చేస్తూ), సమస్త ప్రాణుల పట్ల దయ కలిగి ఉండేవాడు యమాలయానికి వెళ్ళడు.
పరబ్రహ్మమందు మన సుంచి, సత్యవాక్కు గలవాఁడై అసూయ మాని జపతపస్సులు చేయుచు నుండువాఁడు యమబాధల నొందఁడు. అన్నదానమునం దాసక్తుఁడు, నిరతము ఉదకదానము చేయువాఁడు, గోదానము, వృషభదానము చేయువాఁడును వీరు పాపములు పాసినవారలు.
నేటి తెలుగులో పరబ్రహ్మంలో మనసు ఉంచి, సత్యవాక్కు గలవాడై, అసూయ మాని జపతపస్సులు చేస్తూ ఉండేవాడు యమబాధలను పొందడు. అన్నదానంలో ఆసక్తి ఉన్నవాడు, ఎల్లప్పుడూ ఉదకదానం (నీటి దానం) చేసేవాడు, గోదానం, వృషభదానం (ఎద్దు దానం) చేసేవాడు వీరు పాపాలు తొలగినవారు.
ఎవఁడు బాలురకు విద్యాదానంబు చేయునో, ఎవఁడు భక్తితోఁ బరోపకారము చేయువాఁడో వాఁడును యమాలయమును బొందఁడు.
నేటి తెలుగులో ఎవడు బాలురకు విద్యాదానం చేస్తాడో, ఎవడు భక్తితో పరోపకారం చేస్తాడో వాడు కూడా యమాలయాన్ని పొందడు.
ఎవరు విష్ణువును భక్తితో నర్చనచేయుదురో, ఎవరు విష్ణుసన్నిధానమున నుత్తమజపము చేయుదురో, ఎవరు భగవత్ప్రీతికై వివాహోపనయనములను జరిపింతురో, వారు యమాలయపుదాపునకుఁ బోరు. ఎవఁడు మార్గములందు బీదలకై శరణాలయములను, సత్రములను గట్టింతురో దిక్కులేని ప్రేతములకు సంస్కారములను జేయుదురో, వారు జమునిప్రోలు చూడరు.
నేటి తెలుగులో ఎవరు విష్ణువును భక్తితో అర్చన చేస్తారో, ఎవరు విష్ణువు సన్నిధిలో ఉత్తమమైన జపం చేస్తారో, ఎవరు భగవంతుడి ప్రీతి కోసం వివాహాలు, ఉపనయనాలు జరిపిస్తారో, వారు యమాలయం దగ్గరికి కూడా వెళ్ళరు. ఎవరు దారులలో పేదల కోసం శరణాలయాలను, సత్రాలను కట్టిస్తారో, దిక్కులేని ప్రేతాలకు (శవాలకు) సంస్కారాలను చేస్తారో, వారు యమపురిని చూడరు.
ప్రతిదినంబునను సాలగ్రామంబులను బూజించి సాలగ్రామతీర్థమును పుచ్చుకొని యాసాలగ్రామమునకు నమస్కరించుమానవుఁడు పాతకమునొందఁడు.
నేటి తెలుగులో ప్రతిరోజూ సాలగ్రామాలను పూజించి, సాలగ్రామ తీర్థాన్ని పుచ్చుకొని, ఆ సాలగ్రామానికి నమస్కరించే మనిషి పాపాన్ని పొందడు.
ప్రతిదినము తులసిపూసలను కంఠమున వేసికొని సాలగ్రామవాసియైన మహావిష్ణువు నర్చించువాఁడు యమసదనము వీడ్కొనఁడు. ఎవరియింట తులసి యున్నదో, ఎవరియింట హరికథాకాలక్షేపము జరుగునో, ఎవరు సదా గీతాపారాయణము చేయుదురో, వారు యమపురంబుచాయఁ బోరు. ఎవరియింట భాగవత మున్నదో, ఎవ రింటనుండు భాగవతమును బారాయణచేయుదురో, దానిని పూజచేయుదురో, వారు యమపురికిఁ బోరు.
నేటి తెలుగులో ప్రతిరోజూ తులసిపూసలను మెడలో వేసుకొని సాలగ్రామవాసి అయిన మహావిష్ణువును అర్చించేవాడు యమసదనానికి వెళ్ళడు. ఎవరి ఇంట్లో తులసి ఉంటుందో, ఎవరి ఇంట్లో హరికథా కాలక్షేపం జరుగుతుందో, ఎవరు ఎల్లప్పుడూ గీతాపారాయణం చేస్తారో, వారు యమపురం దరిదాపులకు వెళ్ళరు. ఎవరి ఇంట్లో భాగవతం ఉంటుందో, ఎవరు ఇంట్లో ఉండే భాగవతాన్ని పారాయణం చేస్తారో, దానిని పూజిస్తారో, వారు యమపురికి వెళ్ళరు.
సూర్యుఁడు తులలో నుండు నపుడును మకరమున నుండునప్పుడును, మేషమున నున్నప్పుడును స్నానము చేయువారు క్రిందిలోకములకుఁ బోరు.
నేటి తెలుగులో సూర్యుడు తులలో ఉన్నప్పుడూ, మకరంలో ఉన్నప్పుడూ, మేషంలో ఉన్నప్పుడూ స్నానం చేసేవారు క్రింది లోకాలకు వెళ్ళరు.
రుద్రాక్షమాలను ధరించి జపము చేయువారును దానపరులును ఎప్పటికిని యమాలయమునకుఁ బోనేరరు. అచ్యుత అనంత గోవింద కృష్ణ నారాయణ అవ్యయ అని యెవరు ప్రతిదినము విష్ణువును బూజింతురో వా రధమలోకంబునొందరు. ఎవఁడు మణికర్ణికానదీతీరమున హరినామస్మరణచేయుచు మృతి నొందునో వాఁడు సర్వపాపముల నొనర్చినవాఁ డయ్యును జముని ప్రోలికిఁ జనఁడు.
నేటి తెలుగులో రుద్రాక్షమాలను ధరించి జపం చేసేవారూ, దానశీలురూ ఎప్పటికీ యమాలయానికి వెళ్ళరు. ‘అచ్యుత, అనంత, గోవింద, కృష్ణ, నారాయణ, అవ్యయ’ అని ఎవరు ప్రతిరోజూ విష్ణువును పూజిస్తారో వారు అధమలోకాన్ని పొందరు. ఎవడు మణికర్ణికా నదీతీరంలో హరినామస్మరణ చేస్తూ మరణిస్తాడో వాడు సమస్త పాపాలు చేసినవాడైనా యమపురికి వెళ్ళడు.
బంగారు దొంగలించినవాఁడు సురాపానముచేసినవాఁడు మిత్రునిం జంపినవాఁడు బ్రహ్మహత్యచేసినవాఁడు గురుతల్పమును గోరినవాఁడు, స్త్రీలను రాజును గురువును జంపినవాఁడు, తక్కుంగల పాతకముల నొనరించినవారును వీరందఱును మరణకాలమున భగవన్నామస్మరణము చేసినంతనే వారిపాపములుదొలఁగును. తెలిసి కాని తెలియక కాని భగవన్నామస్మరణము చేయుట మహాపాపముల నొనర్చినవారికైననుపాపహరము.
నేటి తెలుగులో బంగారం దొంగిలించినవాడు, సురాపానం (మద్యపానం) చేసినవాడు, మిత్రుడిని చంపినవాడు, బ్రహ్మహత్య చేసినవాడు, గురుతల్పాన్ని (గురువు భార్యను) కోరినవాడు, స్త్రీలను, రాజును, గురువును చంపినవాడు, మిగిలిన పాపాలు చేసినవారు వీరందరూ మరణకాలంలో భగవన్నామస్మరణ చేయగానే వారి పాపాలు తొలగిపోతాయి. తెలిసి గానీ, తెలియక గానీ భగవన్నామస్మరణ చేయడం మహాపాపాలు చేసినవారికైనా పాపాలను పోగొడుతుంది.
పేరునకుఁగాని హేళనమునకుఁగాని ఇతరుల, కుపదేశించుటకు మాత్రముగాని మహావిష్ణువు నామము నుచ్చరించినయెడల సకలపాపములు తొలఁగునని పెద్ద లందురు.
నేటి తెలుగులో పేరు కోసం గానీ, హేళనగా గానీ, ఇతరులకు ఉపదేశించడానికి మాత్రమే గానీ మహావిష్ణువు నామాన్ని ఉచ్చరిస్తే సకల పాపాలూ తొలగిపోతాయని పెద్దలు అంటారు.
భ్రష్టుఁడైనను, చపలుఁడైనను, వ్రతోల్లంఘనుఁ డయినను హరియని యబుద్ధిపూర్వకముగా చెప్పినను నరకము నొంద నర్హుఁడు గాఁడు. మఱియు నెవఁడు సర్వపాపములఁబోఁగొట్టు హరినామముల నన్నిటిని బలుకునో వాఁడు నరకబాధ నొందఁడు.
నేటి తెలుగులో భ్రష్టుడైనా, నిలకడ లేనివాడైనా, వ్రతాన్ని ఉల్లంఘించినవాడైనా ‘హరి’ అని అనుకోకుండా పలికినా నరకాన్ని పొందడానికి అర్హుడు కాడు. అంతేకాక, ఎవడు సర్వపాపాలనూ పోగొట్టే హరినామాలన్నిటినీ పలుకుతాడో వాడు నరకబాధను పొందడు.
జన్మాంతరసంపాదితములైనవియు ప్రాయశ్చిత్తములచేతను నివారణగానివియునగు సకలపాపములును దేవలోకవాసులకైనను, మర్త్యలోకవాసులకైనను విష్ణువుయొక్క నామముల సంకీర్తనచేయుటచేఁ దొలఁగిపోవును. ఈయజామీళుఁడు మరణము నొందుచు భగవంతుని నామము నుచ్చరించెను గాన నీతఁ డొనర్చినచిన్నగొప్పపాపములెల్లఁ దొలఁగును. దీనికి సందియములేదు. కనుక అగ్నిహోత్రమునందు వేసినదూదివలె సకలపాపములును బూదియగును.
నేటి తెలుగులో గత జన్మలలో సంపాదించినవీ, ప్రాయశ్చిత్తాల చేత కూడా నివారణ కానివీ అయిన సకల పాపాలూ దేవలోకవాసులకైనా, మర్త్యలోకవాసులకైనా విష్ణువు నామాలను సంకీర్తన చేయడం వల్ల తొలగిపోతాయి. ఈ అజామీళుడు మరణిస్తూ భగవంతుడి నామాన్ని ఉచ్చరించాడు కాబట్టి ఇతడు చేసిన చిన్న, గొప్ప పాపాలన్నీ తొలగిపోతాయి. దీనికి సందేహం లేదు. కనుక అగ్నిహోత్రంలో వేసిన దూదిలా సకల పాపాలూ బూడిద అవుతాయి.”
ఎక్కువవెలుఁగుతో వెలుఁగుచున్న విష్ణుదూతలు యమభటులతో నిట్లు పలికి, యజామీళుని పసిడిమయ మగు విమానముపైఁ గూర్చుండఁ బెట్టి, మిక్కిలి జాగరూకతతో వైకుంఠమునకుఁ దోడ్కొనిపోయిరి. అపు డజామీళుఁడు కిన్నరులఁజూడఁ దమకపడి, భగవంతుని తనశిరంబుతో మ్రొక్కి, యమదూతలయు, విష్ణుదూతలయు సంవాదమును విని, “ఓమహాత్ములారా! తమ దర్శనంబున నేను ధన్యుఁడనైతిని. మీయనుగ్రహము నొందితి. మహాపాపుఁడనైన నేను మీయనుగ్రహమువలన సకలపాపములనుండి తొలఁగితిని. ఏను సజ్జనదూష్యమైనది, పాపముల నొసఁగునదియు నైన మహానికృష్ట మగు పని యెంతో యొనర్చితిని. ఏను హీనగుణుఁడను. తొల్లింటిజన్మమున నేఁ జేసిన పాపంబు లెల్లఁ దొలఁగినవి. ఏను పతివ్రతయు, ప్రాయంపుదియునైన ప్రియురాలిని వదలి, మద్యపానలోలురాలును, చెడిపెయు నగు నీయధమురాలిని స్వీకరించితిని. మూఢుఁడనైన నేను ముసలివాండ్రును, వేఱుదిక్కులేనివారును, వేఱెవ్వరికడ నుండనివారును, పాపరహితులు నైన తల్లిదండ్రులను విడిచి పెట్టితిని. ధర్మహానిచేయువారును కాముకులునైనవారు పోవునట్టికడు దారుణమైన ఘోరనరకమునఁ బడవలసినవాఁడనే. ఇప్పుడు నేఁ గన్నది కలయో? లేక నే నొక యద్భుతమును జూచితినో ఓకృష్ణా! ఘోరఖడ్గధారులగు యమకింకరు లెచ్చటఁ బోయిరి?
నేటి తెలుగులో ఎక్కువ వెలుగుతో వెలుగుతున్న విష్ణుదూతలు యమభటులతో ఇలా పలికి, అజామీళుడిని బంగారుమయమైన విమానంపై కూర్చోబెట్టి, ఎంతో జాగ్రత్తతో వైకుంఠానికి తీసుకొని వెళ్ళారు. అప్పుడు అజామీళుడు కిన్నరులను చూడాలని తమకపడి, భగవంతుడికి తన శిరస్సుతో మొక్కి, యమదూతలకూ విష్ణుదూతలకూ జరిగిన సంవాదాన్ని విని, “ఓ మహాత్ములారా! మీ దర్శనంతో నేను ధన్యుడినయ్యాను. మీ అనుగ్రహాన్ని పొందాను. మహాపాపాత్ముడినైన నేను మీ అనుగ్రహం వల్ల సకల పాపాల నుంచి బయటపడ్డాను. నేను సజ్జనులు దూషించేదీ, పాపాలను ఇచ్చేదీ అయిన మహా నికృష్టమైన పని ఎంతో చేశాను. నేను హీనమైన గుణం కలవాడిని. గత జన్మలో నేను చేసిన పాపాలన్నీ తొలగిపోయాయి. నేను పతివ్రత, యవ్వనంలో ఉన్నదీ అయిన ప్రియురాలిని వదిలిపెట్టి, మద్యపాన వ్యసనం ఉన్నదీ, చెడిపోయినదీ అయిన ఈ అధమురాలిని స్వీకరించాను. మూఢుడినైన నేను ముసలివారూ, వేరే దిక్కు లేనివారూ, వేరెవరి దగ్గరా ఉండనివారూ, పాపం లేనివారూ అయిన తల్లిదండ్రులను విడిచిపెట్టాను. ధర్మానికి హాని చేసేవారూ, కాముకులూ అయినవారు వెళ్ళే మిక్కిలి దారుణమైన ఘోరనరకంలో పడవలసినవాడినే. ఇప్పుడు నేను కన్నది కలా? లేక నేను ఒక అద్భుతాన్ని చూశానా? ఓ కృష్ణా! భయంకరమైన కత్తులు ధరించిన యమకింకరులు ఎక్కడికి పోయారు?
తొంటిజన్మంబున నేనుబుణ్యకార్యములను జేసియుండవలయును. అట్లు కాకున్నచో బోయతఁగూడియున్న నాకుఁ వైకుంఠనాథుండగు శ్రీమన్నారాయణమూర్తియొక్క నామోచ్చారణమునకు మనసు రాకయేయుండును. బ్రహ్మహత్య నొనర్చినవాఁడును, మంచిచెడ్డలు విచారింపని సిగ్గిడినినైన నే నెక్కడ? నారాయణ యను మోక్షప్రద మగు భగవన్నామ మెక్కడ! నాపూర్వపుణ్యవిశేషమే యీనామోచ్చారణకు హేతు వయ్యెను. అని పలికి, భగవంతునియందు భక్తి పూని, పరమాత్మను మనంబున ధ్యానించుచు విష్ణుసాయుజ్యము నొందెను. నారాయణనామోచ్చారణము జగంబున కెల్ల శాశ్వతరక్షకమయినది. కావున నాభగవన్నామోచ్చారణము చేయువాఁడు సకలపాపములనుండి తొలఁగినవాఁడై పరమపదము నొందును.
నేటి తెలుగులో గత జన్మలో నేను పుణ్యకార్యాలు చేసి ఉండాలి. అలా కాకపోతే బోయదానితో కూడి ఉన్న నాకు వైకుంఠనాథుడైన శ్రీమన్నారాయణమూర్తి నామోచ్చారణకు మనసు రాకుండానే ఉండేది. బ్రహ్మహత్య చేసినవాడినీ, మంచిచెడులు ఆలోచించని సిగ్గులేనివాడినీ అయిన నేనెక్కడ? ‘నారాయణ’ అనే మోక్షాన్ని ఇచ్చే భగవన్నామం ఎక్కడ! నా పూర్వపుణ్య విశేషమే ఈ నామోచ్చారణకు కారణమైంది” అని పలికి, భగవంతుడిపై భక్తి వహించి, పరమాత్మను మనసులో ధ్యానిస్తూ విష్ణుసాయుజ్యాన్ని (విష్ణువులో ఐక్యమయ్యే స్థితిని) పొందాడు. నారాయణ నామోచ్చారణ లోకమంతటికీ శాశ్వత రక్షకమైనది. కాబట్టి ఆ భగవన్నామోచ్చారణ చేసేవాడు సకల పాపాల నుంచీ తొలగినవాడై పరమపదాన్ని పొందుతాడు.
ఇది శ్రీస్కాందపురాణాంతర్గత కార్తికమాహాత్మ్యమందలి తొమ్మిదవ యధ్యాయము.



