Bhakti

కార్తీక పురాణం 6వ రోజు

Karthika Puranam Day 6

పంచామృతాభిషేకం, పిండి, వెండి ప్రమిదల కార్తీక దీపదానం; విప్రుని బోధతో ద్రవిడ కాంత వ్రతం చేసి స్వర్గం చేరిన కథ.

జనకనృపాలా! కార్తికమాసమునఁబూర్తిగానెవఁడు భక్తితో మిక్కిలి ప్రకాశమానుఁడయిన శ్రీమహావిష్ణువునకు పంచామృతముతోను కస్తూరిగంధముగలిపిన జలముతోను నభిషేకము గావించునో వాఁడు వేయి యశ్వమేధయాగముల ఫలమునుబొంది యుత్తమగతి నొందును.

నేటి తెలుగులో జనక నృపాలా! కార్తీక మాసంలో పూర్తిగా ఎవరైతే భక్తితో, మిక్కిలి ప్రకాశించే శ్రీమహావిష్ణువుకు పంచామృతంతోనూ, కస్తూరి గంధం కలిపిన నీటితోనూ అభిషేకం చేస్తాడో, అతడు వేయి అశ్వమేధ యాగాల ఫలాన్ని పొంది ఉత్తమ గతిని పొందుతాడు.

కార్తికమాసంబున బ్రతిదినమును సాయంకాలమున విష్ణుమ్రోల నేఁడు దీపము వెట్టునో, ఆతఁడు తఱుగని విష్ణుసాయుజ్యము నొందును.

నేటి తెలుగులో కార్తీక మాసంలో ప్రతిరోజూ సాయంకాలం విష్ణువు ఎదుట ఎవరైతే దీపం పెడతాడో, అతడు తరగని విష్ణుసాయుజ్యాన్ని (విష్ణువులో ఐక్యమయ్యే స్థితిని) పొందుతాడు.

కార్తికమాసంబున నెవఁడు దీపదానముచేయునో, అతఁడుత్తమజ్ఞానమునొంది, విష్ణుసాయుజ్యము నొందును.

నేటి తెలుగులో కార్తీక మాసంలో ఎవరైతే దీపదానం చేస్తాడో, అతడు ఉత్తమ జ్ఞానాన్ని పొంది విష్ణుసాయుజ్యాన్ని పొందుతాడు.

కార్తికమాసంబునఁ బ్రతిదినము ప్రత్తిచక్కఁగాఁదీసి, వత్తిచేసికొని బియ్యపుఁబిండితోనైనను గోధుమపిండితోనైనను ప్రమిదెలు చేసి, యందు నేతిని బోసి వత్తివేసి దీపమువెలిఁగించి యాపాత్రమును వేదవేత్తయైన బ్రాహ్మణునికి దానము చేయవలయును.

నేటి తెలుగులో కార్తీక మాసంలో ప్రతిరోజూ పత్తిని చక్కగా తీసి వత్తి చేసుకొని, బియ్యపు పిండితో గానీ గోధుమ పిండితో గానీ ప్రమిదలు చేయాలి. అందులో నెయ్యి పోసి, వత్తి వేసి, దీపం వెలిగించి, ఆ పాత్రను వేదాలు తెలిసిన బ్రాహ్మణుడికి దానం చేయాలి.

విదేహనృపాలా! ఇట్లు నెలయంతయుఁ జేసి నెలకడను వెండితో నొక ప్రమిద సేయించి యందు బంగారువత్తిని వేయించి పిండితో కుదురుచేసి దానినడుమ నీప్రమిదను వత్తిని నుంచి దీపముతో నొక యోగ్యుఁడైన బ్రాహ్మణున కొసఁగ వలయును. ఆవల బ్రాహ్మణులకు భోజనంబుఁ బెట్టవలయును. అట్లు బ్రాహ్మణులకు దీపదానము చేయునప్పుడు “సకలవిధంబున జ్ఞానంబు నొసఁగు నదియు, సకలసంపదలు నొసఁగునదియు నైన దీపదానంబు సేయుచున్నాను. నాకు క్షేమము గలుగును గాక” అని యర్థ మిచ్చు మంత్రముఁ జెప్పవలయును.

నేటి తెలుగులో విదేహ నృపాలా! ఇలా నెలంతా చేసి, నెల చివరన వెండితో ఒక ప్రమిద చేయించి, అందులో బంగారు వత్తిని వేయించాలి. పిండితో కుదురు (అడుగున ఉంచే ఆధారం) చేసి, దాని మధ్యలో ఈ ప్రమిదను, వత్తిని ఉంచి, దీపంతో ఒక యోగ్యుడైన బ్రాహ్మణుడికి ఇవ్వాలి. ఆ తరువాత బ్రాహ్మణులకు భోజనం పెట్టాలి. అలా బ్రాహ్మణులకు దీపదానం చేసేటప్పుడు “సకల విధాలా జ్ఞానాన్ని ఇచ్చేది, సకల సంపదలనూ ఇచ్చేది అయిన దీపదానం చేస్తున్నాను. నాకు క్షేమం కలగాలి” అనే అర్థం వచ్చే మంత్రాన్ని చెప్పాలి.

విదేహనృపాలా! పురుషుఁడేని స్త్రీయేని యెవఁడీవిధంబున నీకార్తికమాసంబు పూర్తిగాఁ జేయునో అతఁడు తఱుగని మోక్షము నొందును.

నేటి తెలుగులో విదేహ నృపాలా! పురుషుడైనా, స్త్రీ అయినా ఎవరైతే ఈ విధంగా ఈ కార్తీక మాసం పూర్తిగా చేస్తారో, వారు తరగని మోక్షాన్ని పొందుతారు.

దీపదానముచేయువాఁడు విద్యనొందును, దీపదానము చేయువాఁడు వేదముల నెఱుఁగును, దీపదానము చేయువాఁడు దీర్ఘాయుస్సు నొందును, దీపదానము చేయువాఁడు స్వర్గము నొందును, మానసమునను వాక్కులచేతను చేతులతోను తెలిసియో తెలియకయోచేసిన పాపము కార్తికమాసమున దీపము దానము వలనఁ దొలఁగిపోవును.

నేటి తెలుగులో దీపదానం చేసేవాడు విద్యను పొందుతాడు. దీపదానం చేసేవాడు వేదాలను తెలుసుకుంటాడు. దీపదానం చేసేవాడు దీర్ఘాయుస్సును పొందుతాడు. దీపదానం చేసేవాడు స్వర్గాన్ని పొందుతాడు. మనసుతోనూ, మాటలతోనూ, చేతులతోనూ తెలిసో తెలియకో చేసిన పాపం కార్తీక మాసంలో దీపదానం వల్ల తొలగిపోతుంది.

జనకనృపాలా! ఒక్కపురాతనమైన యితిహాసముసెప్పెద నాలకింపుము. తొల్లి ద్రవిడదేశమున బిడ్డలు చుట్టములులేనిదై భిక్షాన్నముచే జీవించునొకయతివయుండెను. అది యొక్కనాఁడేనివంటవార్పు లొనర్చి భోజనము చేయక యెవ్వరేని వేసిన చలిదియన్నముగుడుచుచుఁ గాలము పుచ్చుచుండెను. అది యెల్లప్పు డొరులకు వంటవార్పులుచేయునది. ఎల్లప్పు డొరులకు నలుఁగుపిండ్లు నూరి యిచ్చును. క్రయ విక్రయములచే జీవించుచుఁ దాను దినఁగా మిఁగిలినది యమ్మిసొమ్ము సంపాదించుచునుండెను. విష్ణువుయొక్క పాదారవిందములను నొక్కనాఁడేని ధ్యానించి యెఱుఁగదు. విష్ణుకథ విన్నది కాదు. పుణ్యస్థలములకు యాత్ర సేయదు. ఏకాదశినాఁడైన నుపవాసముండినది కాదు. ఎటులో యొకవిధంబున ద్రవ్యము సంపాదించినది కాని యొరుల కుపకారంబు సేయదు. దానము సేయదు. తానును గుడువదు. ఇట్లు ఆయతివ కడులోభియై యుండెను.

నేటి తెలుగులో జనక నృపాలా! ఒక పురాతనమైన ఇతిహాసం చెబుతాను, విను. పూర్వం ద్రవిడ దేశంలో పిల్లలు, చుట్టాలు లేక భిక్షాన్నంతో జీవించే ఒక స్త్రీ ఉండేది. ఆమె ఒక్కరోజైనా వంటవార్పులు చేసుకొని భోజనం చేయకుండా, ఎవరైనా వేసిన చద్దన్నం తింటూ కాలం గడిపేది. ఆమె ఎప్పుడూ ఇతరులకు వంటవార్పులు చేసేది. ఎప్పుడూ ఇతరులకు నలుగుపిండ్లు నూరి ఇచ్చేది. కొనుగోలు, అమ్మకాలతో జీవిస్తూ, తాను తినగా మిగిలినదాన్ని అమ్మి డబ్బు సంపాదించేది. విష్ణువు పాదారవిందాలను ఒక్కరోజైనా ధ్యానించి ఎరగదు. విష్ణుకథ విన్నది కాదు. పుణ్యస్థలాలకు యాత్ర చేయదు. ఏకాదశి నాడైనా ఉపవాసం ఉన్నది కాదు. ఏదో ఒక విధంగా డబ్బు సంపాదించిందే గానీ ఇతరులకు ఉపకారం చేయదు. దానం చేయదు. తానూ తినదు. ఇలా ఆ స్త్రీ మిక్కిలి లోభిగా ఉండేది.

ఇట్లాయతివ యజ్ఞానభరితురాలై యుండఁగా, శ్రీరంగమునకుఁ బోవుచున్న యొకదయానిధియగు బ్రాహ్మణుఁ డాయతివయదృష్టవశంబున పాపాత్మురాలగు దానిం గాంచి యిట్లనియె.

నేటి తెలుగులో ఇలా ఆ స్త్రీ అజ్ఞానంతో నిండి ఉండగా, శ్రీరంగానికి వెళ్తున్న దయానిధి అయిన ఒక బ్రాహ్మణుడు ఆ స్త్రీ అదృష్టం కొద్దీ పాపాత్మురాలైన ఆమెను చూసి ఇలా అన్నాడు.

ఓసీ మూఢురాలా! నామాట లాలకింపుము. చర్మము, మాంసము, ఎముకలు వీనితో నిండిన యీదేహము సుఖదుఃఖములతో నిండినది. ఈదేహ మిడుమలకుఁ బుట్టినిల్లు. పంచభూతములతోఁ గూడిన యీశరీరము ప్రాణము తొలఁగినంతనే, యింటిచూఱయందుఁ బడిన నీటిబిందువులు నలువైపులకు జాఱిపోవులాగున, నాయాభూతంబు లాయాభూతములతోఁ జేరి పోవును. నీటిబుడగవలె దేహము నశించును. నీవనిత్యమగు దేహమును సతమని నమ్మియున్నావు. అది యవివేకము. ఓమూఢురాలా! యాయవివేకమును బాయుము. మిడుత యగ్నియందుఁ బడి నశించిన చొప్పున, నీదేహ మెన్నటికైనను నశించునదే. నిత్యస్వరూపుఁడైన, సకలభూతదయాపరుఁడగు భగవంతునిఁ దలంపుము. శ్రీమహావిష్ణువుయొక్క పాదారవిందములను ధ్యానింపుము. కామ, క్రోధ, లోభములను, దేహాభిమానమును, ద్రవ్యాభిలాషను మానుము. వేఱొండు తలంపు తలంపని భక్తితో విష్ణుపాదయుగంబును మ్రొక్కుము. కేశవుని యందు భక్తితో కార్తికమాసంబున స్నానమును, మహావిద్వాంసుఁడగు బ్రాహ్మణునకు దీపదానంబును జేయవలయును. అట్లొనర్చినయెడల, జన్మాంతరమునఁ జేసిన సకలపాపములును గూడ నశించుచున్నవి.

నేటి తెలుగులో “ఓసీ మూఢురాలా! నా మాటలు విను. చర్మం, మాంసం, ఎముకలతో నిండిన ఈ దేహం సుఖదుఃఖాలతో నిండినది. ఈ దేహం కష్టాలకు పుట్టినిల్లు. పంచభూతాలతో కూడిన ఈ శరీరంలో ప్రాణం పోగానే, ఇంటి చూరు మీద పడిన నీటి బిందువులు నలువైపులకూ జారిపోయేటట్లు, ఆయా భూతాలు ఆయా భూతాలలో కలిసిపోతాయి. నీటి బుడగలా దేహం నశిస్తుంది. నీవు అనిత్యమైన దేహాన్ని శాశ్వతమని నమ్మి ఉన్నావు. అది అవివేకం. ఓ మూఢురాలా! ఆ అవివేకాన్ని విడిచిపెట్టు. మిడత అగ్నిలో పడి నశించినట్లు, ఈ దేహం ఎప్పటికైనా నశించేదే. నిత్యస్వరూపుడైన, సకల ప్రాణుల పట్ల దయగల భగవంతుడిని తలచుకో. శ్రీమహావిష్ణువు పాదారవిందాలను ధ్యానించు. కామ, క్రోధ, లోభాలను, దేహాభిమానాన్ని, ద్రవ్యాభిలాషను మానుకో. మరొక తలంపు లేని భక్తితో విష్ణువు రెండు పాదాలకు మొక్కు. కేశవునిపై భక్తితో కార్తీక మాసంలో స్నానం, మహా విద్వాంసుడైన బ్రాహ్మణుడికి దీపదానం చేయాలి. అలా చేస్తే, ఇతర జన్మలలో చేసిన సకల పాపాలూ కూడా నశిస్తాయి.”

అని యిట్లాబ్రాహ్మణుఁడు పలికి తూర్పుదిక్కునకుఁ బయనమై పోయెను. ఆకాంతయు విప్రునిపలుకులు విని తనపాపకృత్యములకుఁ బశ్చాత్తాపపడి యావిప్రుఁడు చెప్పిన చొప్పున కార్తికవ్రతంబు నాచరించెను. సూర్యోదయముననే కార్తికమాసమున స్నానముచేసి విష్ణువుఁ బూజించి దీపదానంబు గావించి, పురాణమును బ్రాహ్మణునివలన విని యానెల కడపట బ్రాహ్మణోత్తములకు సంతర్పణంబుఁ గావించెను. ఆకాంత కార్తికమాసమంతయుఁ జన్నీట స్నానమాచరించెను. కానఁ గడుపున నొప్పియు చలిజ్వరమును వచ్చి రేయింబవ ళ్లాయతివను బాధించెను. గాని యావల నెవ్వరును దిక్కులేక మృతినొందియు స్వర్గలోకంబు నొందెను. కావునఁ గార్తిక మాసంబున దీపదానము ప్రశస్తమని చెప్పఁబడినది. దీపదానమువలన జ్ఞానముచేఁగాని యజ్ఞానముచేఁగాని చేసిన సకలపాపంబులు తొలఁగిపోవును. ఇందు సందియములేదు. తొల్లి పరమేశ్వరుఁ డీవ్రతమహిమంబు నెఱిఁగించెను. నృపాలా! యీరహస్యవ్రతంబును నీ కెఱిఁగించితిని. దీనివలన సంసారబంధంబు తొలఁగిపోవును. అని వసిష్ఠమునీంద్రుఁడు జనకమహారాజున కెఱిఁగించెను.

నేటి తెలుగులో అని ఆ బ్రాహ్మణుడు పలికి తూర్పు దిక్కుకు ప్రయాణమై వెళ్ళిపోయాడు. ఆ స్త్రీ కూడా బ్రాహ్మణుడి మాటలు విని, తన పాపకృత్యాలకు పశ్చాత్తాపపడి, ఆ బ్రాహ్మణుడు చెప్పినట్లే కార్తీక వ్రతాన్ని ఆచరించింది. సూర్యోదయాన్నే కార్తీక మాసంలో స్నానం చేసి, విష్ణువును పూజించి, దీపదానం చేసి, పురాణాన్ని బ్రాహ్మణుడి ద్వారా విని, ఆ నెల చివరన బ్రాహ్మణోత్తములకు సంతర్పణ (భోజన సమారాధన) చేసింది. ఆ స్త్రీ కార్తీక మాసమంతా చన్నీళ్ళతో స్నానం ఆచరించింది. అందువల్ల కడుపునొప్పి, చలిజ్వరం వచ్చి రాత్రింబవళ్ళు ఆ స్త్రీని బాధించాయి. అయినా ఆ తరువాత ఎవరూ దిక్కులేక మరణించి కూడా స్వర్గలోకాన్ని పొందింది. అందువల్ల కార్తీక మాసంలో దీపదానం ప్రశస్తమని చెప్పబడింది. దీపదానం వల్ల తెలిసి గానీ, తెలియక గానీ చేసిన సకల పాపాలూ తొలగిపోతాయి. ఇందులో సందేహం లేదు. పూర్వం పరమేశ్వరుడు ఈ వ్రత మహిమను తెలియజేశాడు. “నృపాలా! ఈ రహస్య వ్రతాన్ని నీకు తెలియజేశాను. దీనివల్ల సంసారబంధం తొలగిపోతుంది” అని వసిష్ఠ మునీంద్రుడు జనక మహారాజుకు తెలియజేశాడు.

ఇది శ్రీ స్కాందపురాణాంతర్గతంబగు కార్తికమాహాత్మ్యమందలి ఆఱవయధ్యాయము.

Back to top