Bhakti

కార్తీక పురాణం 29వ రోజు

Karthika Puranam Day 29

సుదర్శన చక్రం అంతర్ధానం; అంబరీషుని ఇంట దుర్వాసుడు భుజించడం; కార్తీక శుద్ధ హరిబోధిని ద్వాదశి దాన, పారణల మహిమ.

సుదర్శన మివ్విధంబున నంబరీషునితోఁ జెప్పి యతనియెదుటనే యంతర్ధాన మయ్యెను. అట్లు విష్ణుచక్ర మంతర్ధానమొందఁగా, నంబరీషమహారాజు పాపరహితుఁడయిన దూర్వాసమునీంద్రుని సాష్టాంగముగఁ బ్రణమిల్లి, భక్తి మున్నిడుకొని సంతుష్టుఁడై యామునీంద్రునితో నిట్లనియె. ఓ మునీంద్రా! పాపపు టడుసునఁ బడిపోవుచున్న గృహస్థుఁడనైన నన్ను లేవనెత్తుము. మాయింట నతిథిసత్కారమును గైకొనుము. మునీంద్రా, తాము మఱల నాగృహమునకు వచ్చితిరి గాన తమచే నేఁ గాపాడఁబడితిని. నన్నుఁ గావ వచ్చితిరే కాని వేఱు గాదు. దీన సందియము లేదు. జగత్తు నెల్ల వెఱపించు తమకు లోకమువలన భీతియెక్కడిది? భయ మను నెపముచే నన్ను రక్షించుటకే మఱల మాయింటి కేతెంచితిరి. మఱల దర్శనమొసఁగి యభయము నొసఁగియుఁ బ్రాణదానము సేసితిరి. అంతియకాక, పరమపదప్రాప్తిని గలిగించితిరి అని యిట్లు పలుకుచున్న రాజును దుర్వాసమునీంద్రుఁడు కౌఁగిలించికొని, డెందమున నానంద ముప్పొంగ నామహారాజును లేవనెత్తి యిట్లనియె. ఓనృపాలా, ప్రాణదాత తండ్రి యనఁబడు. నీవు నాప్రాణముల రక్షించితివి. కావున నీవు నాకుఁ దండ్రివి. నేను నీకు నమస్కరించితినేని నీవు కష్టము నొందుదువు కావున నేను నీకు నమస్కరింపను. బ్రాహ్మణులయెడ సాధువయిన నిన్నెక్కువశ్రమపెట్టితిని. దానికిఁ దగినఫలము నాకుఁ జాలఁ గలిగినది. సందియములేదు. నరేంద్రా! యాపాపఫలమైన నాకష్టమును దయాళుఁడవగు బ్రాహ్మణభక్తిగలనీవు తీర్చితివి. నీతోడ మీయింట నిస్సంశయముగా భోజనమొనర్చెద ననిపలికి యమ్మునీంద్రుఁడంబరీషమునీంద్రునితోఁగూడభుజించెను. ధర్మజ్ఞుఁడయినపరమేశ్వరుఁడగుదుర్వాసుఁడుదయాళువును, ధర్మముల నెఱిఁగిన వాఁడును, విష్ణుభక్తుఁడును నైన యంబరీషుని భక్తిని పరీక్షించునిమిత్తమయి పోయి, యాతనిభక్తికై యతనింబొగడి యాతని యనుజ్ఞవడసి నిజనివాసమున కరిగెను. కనుక, మునీంద్రా! కార్తికమున హరిబోధిని యగుద్వాదశి సకలయజ్ఞములఫలం బొసఁగును. సకలదానములఫలము నిచ్చును. పుణ్యతీర్థము లన్నిట స్నానముచేసినపుణ్యము లభించును. ఎవఁడు కార్తికశుద్ధైకాదశినాఁ డుపవసించి రాత్రి జాగరణముచేసి ద్వాదశినాఁడు బ్రాహ్మణులకు దానముల నెల్ల నొసఁగి, భక్తితోఁ బారణసేయునో అతఁడు వెంటనే ప్రాయశ్చిత్తములేని సమస్తపాపములచే విడువఁబడును. కార్తికమున శుక్లపక్షమున విష్ణువల్లభయగు ద్వాదశి యించుకంతయున్నను, ఉత్తమలోకముఁ బడయఁగోరు విష్ణుభక్తులా ద్వాదశిని విడువక తప్పక పారణసేయవలయును. ఓమునిశ్రేష్ఠా! హరిబోధిని ద్వాదశిని దప్పక విడువరాదు. కార్తికశుద్ధద్వాదశినాఁ డొనర్చినదానము పారణము మహాఫలము నొసఁగును. ఈయుపాఖ్యానమును శ్రద్ధాభక్తులతో విన్నవాఁడు సకలపాపములనుండి తప్పి పుత్రపౌత్రాదులతోఁ గూడి సకలసుఖముల ననుభవించి, యుత్తమగతి నొందును. అని అత్రిమహర్షి యగస్త్యునకుఁ జెప్పెను.

నేటి తెలుగులో సుదర్శనం ఈ విధంగా అంబరీషుడితో చెప్పి అతని ఎదుటనే అంతర్ధానమైంది. అలా విష్ణుచక్రం అంతర్ధానం కాగానే, అంబరీష మహారాజు పాపరహితుడైన దూర్వాస మునీంద్రుడికి సాష్టాంగంగా నమస్కరించాడు. భక్తిని ముందుంచుకొని సంతోషంతో ఆ మునీంద్రుడితో “ఓ మునీంద్రా! పాపపు బురదలో పడిపోతున్న గృహస్థుడినైన నన్ను లేవనెత్తండి. మా ఇంట అతిథి సత్కారాన్ని స్వీకరించండి. మునీంద్రా, తమరు మళ్ళీ నా ఇంటికి వచ్చారు కనుక తమరి చేత నేను కాపాడబడ్డాను. నన్ను కాపాడటానికే వచ్చారు కాని వేరు కాదు. ఇందులో సందేహం లేదు. జగత్తునంతా భయపెట్టే తమరికి లోకం వల్ల భయమెక్కడిది? భయం అనే నెపంతో నన్ను రక్షించడానికే మళ్ళీ మా ఇంటికి వచ్చారు. మళ్ళీ దర్శనమిచ్చి, అభయమిచ్చి, ప్రాణదానం చేశారు. అంతేకాక, పరమపద ప్రాప్తిని కలిగించారు” అని అన్నాడు. ఇలా పలుకుతున్న రాజును దూర్వాస మునీంద్రుడు కౌగిలించుకొని, మనసులో ఆనందం ఉప్పొంగగా ఆ మహారాజును లేవనెత్తి ఇలా అన్నాడు. “ఓ నృపాలా! ప్రాణదాత తండ్రి అనబడతాడు. నీవు నా ప్రాణాలను రక్షించావు. కాబట్టి నీవు నాకు తండ్రివి. నేను నీకు నమస్కరిస్తే నీవు కష్టాన్ని పొందుతావు, కాబట్టి నేను నీకు నమస్కరించను. బ్రాహ్మణుల పట్ల సాధువైన నిన్ను ఎక్కువ శ్రమపెట్టాను. దానికి తగిన ఫలం నాకు చాలా కలిగింది. సందేహం లేదు. నరేంద్రా! ఆ పాపఫలమైన నా కష్టాన్ని దయాళువు, బ్రాహ్మణభక్తి కలవాడివి అయిన నీవు తీర్చావు. నీతో కలిసి మీ ఇంట నిస్సంశయంగా భోజనం చేస్తాను” అని పలికి ఆ మునీంద్రుడు అంబరీష మునీంద్రుడితో కలిసి భుజించాడు. ధర్మజ్ఞుడైన పరమేశ్వరుడైన దూర్వాసుడు దయాళువు, ధర్మాలను తెలిసినవాడు, విష్ణుభక్తుడు అయిన అంబరీషుడి భక్తిని పరీక్షించడం కోసం వెళ్ళి, అతని భక్తికి అతనిని పొగిడి, అతని అనుమతి పొంది తన నివాసానికి వెళ్ళాడు. “కనుక, మునీంద్రా! కార్తీకంలో హరిబోధిని అయిన ద్వాదశి సకల యజ్ఞాల ఫలాన్ని ఇస్తుంది. సకల దానాల ఫలాన్ని ఇస్తుంది. పుణ్యతీర్థాలు అన్నింటిలో స్నానం చేసిన పుణ్యం లభిస్తుంది. ఎవడు కార్తీక శుద్ధ ఏకాదశి నాడు ఉపవాసం ఉండి, రాత్రి జాగరణ చేసి, ద్వాదశి నాడు బ్రాహ్మణులకు దానాలన్నీ ఇచ్చి, భక్తితో పారణ (ఉపవాసం తర్వాత భోజనం) చేస్తాడో, అతడు వెంటనే ప్రాయశ్చిత్తం లేని సమస్త పాపాల నుండి విముక్తుడవుతాడు. కార్తీకంలో శుక్లపక్షంలో విష్ణువల్లభ అయిన ద్వాదశి కొంచెమంత ఉన్నప్పటికీ, ఉత్తమ లోకాన్ని పొందాలని కోరే విష్ణుభక్తులు ఆ ద్వాదశిని విడిచిపెట్టకుండా తప్పక పారణ చేయాలి. ఓ మునిశ్రేష్ఠా! హరిబోధిని ద్వాదశిని తప్పక విడిచిపెట్టకూడదు. కార్తీక శుద్ధ ద్వాదశి నాడు చేసిన దానం, పారణ మహాఫలాన్ని ఇస్తాయి. ఈ కథను శ్రద్ధాభక్తులతో విన్నవాడు సకల పాపాల నుండి తప్పుకొని, పుత్రపౌత్రాదులతో కూడి సకల సుఖాలను అనుభవించి, ఉత్తమగతిని పొందుతాడు” అని అత్రి మహర్షి అగస్త్యుడికి చెప్పాడు.

ఇది శ్రీస్కాందపురాణాంతర్గత కార్తికమాహాత్మ్యమందలి యిరువదితొమ్మిదవ యధ్యాయము.

Back to top