కార్తీక పురాణం 30వ రోజు
Karthika Puranam Day 30
కలియుగంలో ఉత్తమగతిపై ఋషుల ప్రశ్న; సూతుడు కార్తీక వ్రత, నదీస్నాన, దీపదాన, మాహాత్మ్య శ్రవణ ఫలాలను బోధించడం.
ఋషులందఱు సూతమహాముని చెప్పిన పవిత్రమైన మాధవునిమాహాత్మ్యమును విని, కార్తికవ్రతమహిమమును వినఁగోరిన వారలై యిట్లనిరి. “ఓమహాత్మా! మేము మఱిమఱి కార్తికవ్రతమహిమను వినఁగోరెదము. కలియుగంబునఁ బాపమనస్సుగలవారికిని, రాగముతో నిండినవారికిని, సంసారసముద్రమున మునిఁగినవారికిని నాయాసము లేనియుత్తమగతి యేది? సర్వధర్మములలోను మోక్షసాధనమగు ముఖ్యధర్మ మేమి? వేల్పులందఱిలోను నెక్కువ ఫలము నొసఁగు ముఖ్యదేవుఁ డెవ్వఁడు? ఏకర్మచేత మోహము దూరమునకుఁ దొలఁగిపోవును, బుద్ధిహీనులు, మృత్యుపాశమునకుఁ గట్టుపడ్డవారు, జడస్వభావులు నగుమానవులకు సులభముగా నుత్తమగతి యెట్లు లభించును? ఇదియంతయును, భగవంతునిసచ్చరిత్రమును మా కెఱింగింపుము.” అని మునులంద ఱడుగఁగా, సూతుఁడు వారితో నిట్లనియె. ఓమునులారా! మీరు సద్విషయముల నడిగితిరి. గోవిందునిచరిత్రముఁ జెప్పుమంటిరి. సకలలోకంబులకు మేలుగావించు లోకమంగళమును జ్ఞప్తిపఱచితిరి. మీరు బుద్ధిహీనులగు మానవుల శ్రేయస్సును గోరి యడిగిన ప్రశ్న చెవుల కింపైనది. మోక్షము నొసఁగునదియు, వేదము లోకమునందలి ప్రాణులమేలు గావించునవి. మీరును లోకోపకారులగుదురు. కావున, విస్తారదక్షిణ లిచ్చు యాగము లొనర్చిన నెంతఫలము గలుగునో, పరిశుద్ధము లగు తీర్థములు మున్నగు చోట్ల స్నానముచే నెంత ఫలము గలుగునో అంతఫలమును, ఓద్విజశ్రేష్ఠులారా! మీరు పడయుదురు. అందులకు సందియము లేదు. సకలశాస్త్రవేత్తలగు ఓఋషులారా! వినుఁడు. వేదమునందుఁ జెప్పిన కార్తికమునందలి ఫలమును వినుఁడు. విష్ణువునకు ప్రీతిగలిగించునదియు, మిగులనుత్తమమగు కార్తికవ్రతమును గూర్చి చెప్పెద. ఆలకింపుఁడు. కార్తికవ్రతమును గూర్చి విస్తరముగాఁ జెప్పియున్నది. దానినంతయు వర్ణింప నేఁజాలను. సంగ్రహముగా విష్ణునిచరిత్రమును వర్ణించెదను. విష్ణుచరిత్రము వినఁగోరువారు సంసారసాగరమునుండి తప్పించుకొందురు. కార్తికంబున సూర్యుఁడు తులారాశియందుండఁగా, విష్ణువును భక్తితోఁ బూజించి స్నానము, పూజ, దానము, వేయిదీపములు వెలిగించుట యొనరించి, జన్మాంతరార్జితములైన సకలపాపములను బోఁగొట్టుకొనును. సూర్యుఁడు తులారాశియందుఁ బ్రవేశించినదిమొదలు విష్ణుభక్తిపరాయణుఁడై యెవఁడు నెలయంతయుఁ గార్తికవ్రతమునాచరించునో యాతఁడు జీవన్ముక్తుఁ డనఁబడును. బ్రాహ్మణుఁడేని, క్షత్రియుఁడేని, వైశ్యుఁడేని, శూద్రుఁడేని, స్త్రీలు గాని, పురుషులు గాని, కార్తికవ్రతము నాచరింపని మానవులు నరాధము లనఁబడుదురు. వారు తమవంశములతో నంధతమసమను నరకము నొందుదురు. కార్తికమాసము రాఁగానే కావేరీనదీస్నానమాచరించుమానవుఁడు వేల్పులు చుట్టుముట్టికొనియాడ వైకుంఠమునొందును. లేక మఱి యేనదియందైనను కార్తికమాసంబున స్నాన మాచరించి,పాపములనుండి విడుదలనొంది వైకుంఠము నొందును. కార్తికవ్రతము నాచరింపని మానవులు వేలకొలఁది జన్మములు చండాలురై జన్మింతురు. కార్తికమాసము మాసములలో నుత్తమోత్తమము. కార్తికవ్రతము వ్రతములలోమేటియై సకల పాపములఁ బోఁగొట్టునది. పాపాత్ములు వ్రతమే యాచరించుట కడునరుదు. వారికీవ్రతము చేయుటవలన ఫలంబేయరుదు. కార్తికమాసమున సూర్యుఁడు తులారాశియం దుండ కలియుగమున మానవుఁడు విష్ణునిప్రీతికై స్నానము, దానము, హోమము, అర్చనము, సేవ యొనరించెనేని సకలపాపములనుండి విడుదల నొంది, పునర్జన్మరాహిత్యరూపమైన మోక్షము నొందును. కార్తికమాసమున దీపదానము, కంచుపాత్రదానము, విష్ణ్వాలయమున దీపమాలలు వెలిఁగించుట, ఫలములు, ధనము, ధాన్యము గృహము వీని నొసంగుటయు విస్తారఫలము నొసఁగును. దరిద్రుఁడేని, ధనికుఁడేని విష్ణుప్రీతికై ద్విజోత్తమునివలనఁ గార్తికమాహాత్మ్యము వినినయెడల నెక్కువపుణ్యము గలుగును. పాపము లెల్ల నశించి యెక్కువ ఫలమును లభించును. ఈయధ్యాయము వినువాఁడు ఇహపరసుఖములను రెంటిని బొందును. ఓం తత్ సత్.
నేటి తెలుగులో ఋషులందరూ సూతమహాముని చెప్పిన పవిత్రమైన మాధవుని మాహాత్మ్యాన్ని విని, కార్తీక వ్రత మహిమను వినాలని కోరుకున్నవారై ఇలా అన్నారు. “ఓ మహాత్మా! మేము మళ్ళీ మళ్ళీ కార్తీక వ్రత మహిమను వినాలని కోరుకుంటున్నాము. కలియుగంలో పాపపు మనస్సు కలవారికి, మమకారంతో నిండినవారికి, సంసార సముద్రంలో మునిగినవారికి ఆయాసం లేని ఉత్తమ గతి ఏది? అన్ని ధర్మాలలోనూ మోక్షానికి సాధనమైన ముఖ్య ధర్మం ఏమిటి? దేవతలందరిలోనూ ఎక్కువ ఫలాన్ని ఇచ్చే ముఖ్యమైన దేవుడు ఎవరు? ఏ కర్మ వల్ల మోహం దూరంగా తొలగిపోతుంది? బుద్ధిహీనులు, మృత్యుపాశానికి కట్టుబడ్డవారు, జడస్వభావులు అయిన మానవులకు సులభంగా ఉత్తమ గతి ఎలా లభిస్తుంది? ఇదంతా, భగవంతుని సచ్చరిత్రను మాకు తెలియజేయండి.” అని మునులందరూ అడగగా, సూతుడు వారితో ఇలా అన్నాడు. “ఓ మునులారా! మీరు సద్విషయాలను అడిగారు. గోవిందుని చరిత్రను చెప్పమన్నారు. సమస్త లోకాలకు మేలు చేసే లోకమంగళాన్ని గుర్తుచేశారు. మీరు బుద్ధిహీనులైన మానవుల శ్రేయస్సును కోరి అడిగిన ప్రశ్న చెవులకు ఇంపైనది, మోక్షాన్ని ఇచ్చేది. వేదం లోకంలోని ప్రాణులకు మేలు చేసేది. మీరు కూడా లోకోపకారులు అవుతారు. కాబట్టి, విస్తారంగా దక్షిణలు ఇచ్చే యాగాలు చేస్తే ఎంత ఫలం కలుగుతుందో, పరిశుద్ధమైన తీర్థాలు మొదలైన చోట్ల స్నానం చేయడం వల్ల ఎంత ఫలం కలుగుతుందో అంత ఫలాన్ని, ఓ ద్విజశ్రేష్ఠులారా! మీరు పొందుతారు. అందులో సందేహం లేదు. సకల శాస్త్రాలు తెలిసిన ఓ ఋషులారా! వినండి. వేదంలో చెప్పిన కార్తీక మాసపు ఫలాన్ని వినండి. విష్ణువుకు ప్రీతి కలిగించేది, మిక్కిలి ఉత్తమమైనది అయిన కార్తీక వ్రతం గురించి చెప్తాను, ఆలకించండి. కార్తీక వ్రతం గురించి విస్తారంగా చెప్పబడి ఉంది. దాన్నంతా నేను వర్ణించలేను. సంగ్రహంగా విష్ణువు చరిత్రను వర్ణిస్తాను. విష్ణుచరిత్రను వినాలని కోరుకునేవారు సంసార సాగరం నుండి తప్పించుకుంటారు. కార్తీక మాసంలో సూర్యుడు తులారాశిలో ఉండగా, విష్ణువును భక్తితో పూజించి స్నానం, పూజ, దానం, వెయ్యి దీపాలు వెలిగించడం చేసి, గత జన్మలలో సంపాదించుకున్న సకల పాపాలను పోగొట్టుకుంటాడు. సూర్యుడు తులారాశిలో ప్రవేశించినప్పటి నుండి విష్ణుభక్తి పరాయణుడై ఎవడు నెలంతా కార్తీక వ్రతాన్ని ఆచరిస్తాడో, అతడు జీవన్ముక్తుడు (బతికి ఉండగానే ముక్తి పొందినవాడు) అనబడతాడు. బ్రాహ్మణుడు గాని, క్షత్రియుడు గాని, వైశ్యుడు గాని, శూద్రుడు గాని, స్త్రీలు గాని, పురుషులు గాని, కార్తీక వ్రతాన్ని ఆచరించని మానవులు నరాధములు అనబడతారు. వారు తమ వంశాలతో పాటు అంధతమసం అనే నరకాన్ని పొందుతారు. కార్తీక మాసం రాగానే కావేరీ నదీ స్నానం ఆచరించే మానవుడు దేవతలు చుట్టుముట్టి కొనియాడుతుండగా వైకుంఠాన్ని పొందుతాడు. లేదా మరే నదిలోనైనా కార్తీక మాసంలో స్నానం ఆచరించి, పాపాల నుండి విడుదల పొంది వైకుంఠాన్ని పొందుతాడు. కార్తీక వ్రతాన్ని ఆచరించని మానవులు వేలకొద్దీ జన్మలు చండాలురై పుడతారు. కార్తీక మాసం మాసాలలో ఉత్తమోత్తమమైనది. కార్తీక వ్రతం వ్రతాలలో మేటియై సకల పాపాలను పోగొట్టేది. పాపాత్ములు వ్రతమే ఆచరించడం చాలా అరుదు. వారికి ఈ వ్రతం చేయడం వల్ల ఫలమే అరుదు. కార్తీక మాసంలో సూర్యుడు తులారాశిలో ఉండగా కలియుగంలో మానవుడు విష్ణువు ప్రీతి కోసం స్నానం, దానం, హోమం, అర్చన, సేవ చేస్తే సకల పాపాల నుండి విడుదల పొంది, మళ్ళీ జన్మ లేని మోక్షాన్ని పొందుతాడు. కార్తీక మాసంలో దీపదానం, కంచుపాత్ర దానం, విష్ణు ఆలయంలో దీపమాలలు వెలిగించడం, పండ్లు, ధనం, ధాన్యం, గృహం వీటిని ఇవ్వడం కూడా విస్తారమైన ఫలాన్ని ఇస్తుంది. దరిద్రుడు గాని, ధనికుడు గాని విష్ణుప్రీతి కోసం బ్రాహ్మణ శ్రేష్ఠుని నుండి కార్తీక మాహాత్మ్యాన్ని వింటే ఎక్కువ పుణ్యం కలుగుతుంది. పాపాలన్నీ నశించి ఎక్కువ ఫలం కూడా లభిస్తుంది. ఈ అధ్యాయాన్ని వినేవాడు ఇహపర సుఖాలు రెంటినీ పొందుతాడు.” ఓం తత్ సత్.
ఇది శ్రీస్కాందపురాణాంతర్గత కార్తికమాహాత్మ్యమందలి ముప్పదవ యధ్యాయము. శ్రీ కార్తికమాహాత్మ్యము సంపూర్ణము.



